ألا أونا ألا دوي ألا تري
يلا يا هانم بص يا بيه
فتحنا المزاد
قلب للبيع
مين يشتري قلبي مني بتلجه ودفاه
وفوق البيعة عمري معاه
حد اشترى ؟
مين قال أنا
طيب بلاش
ايه رأيكم
لو زيدنا في البيعة الألم
وسنين عذاب وسنين عدم
وعيون حزينه مرغرغه
بألف دمعة وآلف آاااه
مين اللي ناوي يشتري
عندي كمان لقا وفراق
وكتير فرح ويا اشتياق
وحلم ضاع من سكته
ووش راهن ضحكته
وعمر اتسرق منه
ساعاته و فرحته
ميييييييين قال أنا ؟
برضو مفيش
طب اسمعو
ما عادش عندي يا بشر
غير عرض واحد حعرضه
وبعدها هقفل خلاص
باب المزاد
شايفين دموعي الي بقت
زي السحاب
ديا ببلاش
ومشاعر القلب الي داب
برضو ببلاش
طب أقولكم .... كلي ببلاش
العمر اللي عدى بكل ما فيه
والباقي اللي جاي
مين فيكوا ناوي يشتريه
حد اشترى ؟
مين قال أنا ؟
مفيش حد ناوي يشتري ؟
الكل تاه ؟
رجعت خلاص في البيعة يا ناس
نويت قلبي يفضل معايا وخلاص
دورت كتير على مين يشتريه
ملقتش أحن مني عليه
راح أسكن قلبي وأعيش أداويه
ألا أونا ...ألا دوي ...ألا تريه
قفلنا المزاد