محتاجة ...قصيدة للشاعرة / جيهان فتحى

ومحتاجة الظروف إنسان .. 

يكون عاشق ف قلبه حنان .. 

يكون ناصر لدمع العين ... 

يكون هو صلاح الدين .. 

يكون سيفها وجلادها .. 

يكون عمره ما يوم خانها .. 

يضم الشرق والمغرب .. 

يوحدنا ف صلاة مغرب .. 

يكون عامل على المكنة .. 

يكون شيخنا على المدنة ..

ومحتاجة قلوب خضرااا ..

إدين فاطمة مع العدراااا .. 

ومحتاجة الظروف لأديب .. 

يقول الفكر ده مش عيب .. 

ومحتاجة الظروف سمكة .. 

وصنارة .. 

عيال منهارة ف الحارة .. 

كفاية وشوش ماليها الزيف ..

ومحتاجة نبطل كيف .. 

ف لفة حلوة ف سجارة .. 

كفاية العيشة ف مغارة .. 

ومحتاجة نعيش الحلم .. 

نجوم شمعة ف ليل بيضم .. 

لخلانه وأحبابه .. 

ما يترك حد على بابه .. 

ومحتاجة عيالي تعيش .. 

ويوم ألقى رغيف العيش .. 

ومحتاجة عدالة فجر .. 

عمر سابنا يا ليلة القدر .. 

وأنا بدعي ومن يومها .. 

لأمي المولى ويصونها .. 

عشان أمي دي محتاجة .. 

عيال ماتموت ومحتاجة ..