آه ياقلبِى ياللى شايل
كُل آلام الحياه
=
ليه تداوى الناس وجرحك
يألِمَك ماتقولشِ آه
=
واسألـَك وتقولـِّى سيبَك
كُل واحِد لـُه جَزاه
=
ربِّنا عالِم بحالـَك
هوَّ عارف مُنتـَهاه
=
هوَّ عالِم باللى ماشِى
واللى وسط السِكـَّه تاه
=
هوَّ قادِر ع اللى ظالِم
بَس ماهِل للجـُناه
=
كُل وقت ولـُه أدانـُه
كُل واحِد لـُه قـَضاه
=
واللى صابر ع البلاوى
يعلمُه برضو الإلَه
=
واللى مات مظلوم بحقه
ينتقم قاضى القـُضاه
=
مش مُهِم الناس تخونـَك !!
المُهِم تنول رضاه
=
إنتَ صح تمام ياقلبى
بس انا فـَرَّطت ، يــاااه !!
=
نفسى الاقى قلب زَيَّك
وانسِعِد وافرح معاه
=
******
لو مشيت حَ تشوف طبايع
فى البَشـَر تِصعَب عَليك
=
اللى ياخـُد وامَّا يدِّى
يدِّى شوك يجرح ايديك
=
واللى يضحَكلـَك فى وشـَّك
وامَّا تِمشِى يذم فيك
=
واللى لو مديتلـُه إيدَك
يتسِنِد ويدوس عَليك
=
واللى يوصِف حُب غالى
بعدها يجرح عينيك
=
لـَجل قلبُه لِسَّه خالِى
بس اهو بيتسَلـَّى بيك
=
وانتَ سَهران الليالى
لـَجل فاكرُه بيناديك
=
واللى رافِع نفسُه عالِى
عُمرُه يوم مايحِس بيك
=
وامَّا يطلـُب تِرضـَى عَنـُّه
يمدَحَك ويبوس إيديك
=
وامَّا يحتاجلـَك فى حاجَه
يحضـُنـَك لـَمـّا يلاقيك
=
شوف ياقلبى كُلِّ حاجَه
لـَجل يوم ماتقولشِ آآه
=
لـَو حَِ الاقِى قلب زَيـَّك
تِبقـَى ضِحكِتلِى الحياه