فى قهوتنا
فى حتتنا
قعدت فى وسط شلّتنا
فسألونى ؟
مكانك فين ؟
ساكن فين ؟
فين بيتك وعنوانك ؟
قلت لهم نسيتونى !
ما انتوا تمللى تشوفونى
بيتنا فى آخر الصفحة وبابه قزاز
مالوش عنوان
ولا نمرة
ولا برواز
فيه من جوّه سهّارة ولمبة جاز
بيتنا كبير
ما انا لوحدى اللى ساكن فيه
جوّاه مصطبة عمولة
فرشتها فى سنة أولى
عليها يافطة معقولة
تقول دا سرير
عمدانه جذور وبحور
مديد 00وافر
ورجز كمان
أركانه
قوافى كتير
حشراته قليل وكتير
لكن ولا مرّة يأذونى
فيه شمّاعة من مسامير
ولوح لطظان
ومتقطع تلات حتات
حتة رف للكتبات
وحتة لميّتى والزاد
وحتة لشكوتى ونوحى
بتسمعنى
بتفهمنى
فيها طب لجروحى
لمّا الناس يخاصمونى
تواسينى
ولمّا اقعد تسلّينى
هىَّ فى وحدتى مرايتى
لا تغيب عنى
ولا منى بتزهق يوم
جوّه فى آخر الصفحة
بتسمع م الخلايق لوم
مرّة يقولوا مش شاعر
ومرة يقولوا بيجامل
فى ليلى تمللى نوّارة
لا تزعل منى من كلمة
هبلة 00
عبيطة00
جربوعة
ولا من هدمة بالبسها
تكون دايبة ومقطوعة
عرفتوا إسمى ومكانى
وساكن فين
لأن البيت مالوش نمرة
مع العناوين
وزماننا
زمن عناوين
بقيت مجهول00