خايف اقرب من عنيكى..... لانسحر
كل اما افكر فيكى افكر........ انتحر
بافقد توازن صمتى واشعر باجتياح
قلبى البراح..بيحس انه مزدحم
مابحبكيش لكنى ببقى على وشك
انا لما اشوفك ألقى قلبى علا..وشك
والاقى اكتر من سؤال
أسهل ما فيهم انتى من؟
واشك انك م البشر
وبلاقى عمرى ع المحك
عشان جمالك منهمر
شلال قمر نازل على قلبى الشمال
واصل على قلبى اليمين
طالع إلى قلبى العلى
انا اصلى لما باشعرك تتحول الأعضاء قلوب
وشيطانى يتبدل ولى
ما بحبكيش والنية إنى أعشقك
عمرى ما حبيت قبل منك حتى انا
أنا اصلى عايش فى الهوى على منحنى
دايما مركز فى الخطى
علشان ف قلبى منحدر
خايف احب لاروح هدر
خايف اصدق واعتقد
مش مستعد
القلب مش واخد على حل العقد
فامتظهريش وياريت عشانى تختفى
ولو انتى عاوزه تنصفى
تجينى دايما فى المنام
الحلم فيه المتسع
امثالى دايما محرومين
علشان كبار المؤمنين
بالحب لازم يبتلوا
وعنيكى هيه الإبتلا
مابحبكيش علشان تزبد المنزلة
لكنى نفسى أعشقك وارجع بشر
اسهر وادوب
واتمنى انى المسك.... وارجع اتوب
والغى القلوب اللى بقت متمردة
واوصل عنيكى بالدما والأوردة
بس اوعى مرة تغمضى أو ترمشى أو تختشى
تقفل رموشك ع الحياة
لو روحى داعبت مهجتك
إوعى الخجل...إوعى الخجل
ماهو لو عنيكى هاتتكسف
يالا الأسف نظرة لتحت صغيرة
ضاع الأجل ضاع الأجل ضاع الأجل
..............
حمدي موسى