..
حلمت انى هشوفك تانى..
ف الحلم اللى كان مكتوبلى اشوفك فيه ..
نسيت انى عشان انساكى كان لازم ..
يموت الحلم أو حتى .. اغمى عنيه ..
وهحلم ليه ..
مادام حبى ماغيركيش ..
انا بحبك خلاص زكيت ..
على باب الفراق صليت ..
عنيكى لقيتها بتقولى :
صلاتك باطله والنيه .. مابتكفيش ..
عشان ع البعد ماحلفتش ..
حاولت انساكى ماقدرتش ..
يادوب فكرت فيها #نسيت ..
انا بالقرب ماحلمتش ..
وف بعادك حاولت اعيش ..
لقيت الفرقه دلتنى على شطك..
وغصب عن هوايا رسيت ..
على باب اللقا دقيت ..
و أهى رحبت كل المواجع .. ب اللى راجع ..
قلبك يساع ..!!
ولا انت من طول الفراق مليت ..!!
مليت خطاوى السكة فوق رمشك ..
ف رجعت قبل ما تجرحك..او يوجعك ..
طول الطريق ..
عاشق ناداني الهوى ..
من فرحتى لبيت ..
كان نفسي يومها اودعك ..
لكن #نسيت ..
ف سواقى كل الممكنات .. لفيت ..
و برغم كل الذكريات .. حبيت ..
ضحكة عنيكى ف السكات ..
كات بيت ..
فاكره الأغانى والقصايد والليالي و النايات ..
بهتان يا ليل اللارجوع .. لو جيت ..
مكتوب .. تدوق جرعة وفاتك ف الكاسات ..
حتى الطريق مغصوب عليه ..
ف تقول ياريت ..
ياريتنى ابدأها م الأول ..
او ياريتنى م البداية .. ما ابتديت ..
ولو ناسيه / انا فاكر ..
ياريت بعد السنين دى #نسيت ..
و ف عز كل الأمنيات ..
يطلع قرار ب الحبس ..
حبس اشتياقك. وسط دقات العقارب ف الساعات ..
يطلع ب همس ..
مكتوب عليك حكم الخضوع ل الأمس ..
مرسوم يا وشم الذكريات .. ع الحيط ..
محروم يا ورد الاشتياق م اللمس ..
ماشيين طريق اللا وصول بالعكس ..
كل اللى تاب م العشق عاصى ..
ولكل عهد من الوداع توقيت ..
كان لازم افتكر انى ناسى ..
لكن لأنى جبان ..
#نسيت ..
#راغب
#صبري_بهوت