بعد إذنك ممكن أكتب
سطر واحد م الحكاية
أصل دم القلب نازف
وإنتي عارفه
إني حاسس كل حرف من المشاعر
وإني شاعر نهره جف
وإن صف الحجز طال
واللقا...أصبح محال
بعد إذنك
تسمحيلي بسطر تاني
مانتي عارفه
إن نُص الحلم خدعة
وإني بدعة
عاش ف وهم
إن نَص المسرحية
اتكتب علشان عينيه
وف النهاية
ماشافشي شئ
وإن بحر الشوق ف قلبه
كان سراب
عدّي باب الحلم لحظة
فاكتشف
إن حلمه مالوهشي باب
وإن ريح الغربة هب
والفراق أصبح قرار
بعد إذنك تسمحيلي
إني أموت
قبل ما يشدوا الستار
...........
محمد البنا