امي كانت شمس بيتنا
واما غابت كله غاب
والسعادة بعد منها
نسيت ان ف بيتنا باب
.
امي كان الحضن جنة
والعيون بساتين ورود
امي كانت ف المحنة
والعطاء مالهاش حدود
.
امي كانت قلب صافي
مدرسة وفيها العلام
امي كانت حضن دافي
كنت اجري عليه وانام
.
امي كانت لما اتعب
هي تتعب بالساعات
جنبي تسهر كل ليلها
واقفة تعمل كمادات
مستحيل النوم يجيلها
إلا لما اروق وابات
وبحنانها تغطي فيا
وتحكي عن جدي حكايات
.
كنت بادعي بس ربي
كان عشانها بيستجاب
واما تبكي كات تخبي
مهما تكبر كات شباب
مين يهون بعد منها
اللي شفته من العذاب
.
امي لسه بازور سكنها
واقرا م القرآن ياسين
امي لسه مافيش مكانها
يمسح الدمع الحزين
امي مش ح انساها ابدا
مهما مرت من سنين
كل يوم الشوق بيكتر
كل يوم بازداد حنين
.
امي كات تنصحني يابني
كنت بافهم ...واستجيب
بعد منها الكل سابني !!
والحبيب مابقاش حبيب !!
مش ح ارد ف يوم جميلها
مهما اعمل ولا اجيب
امي كان العطف نيلها
اصفي م اللبن الحليب
.
امي كات ف الطبخ فلته
كان طبيخها مالوش مثيل
مااشتكش في مرة زنقة
مهما كان الحال قليل
كات تقولي يابني اصبر
آخر المشوار جميل
اللي يصبر يابني يقدر
يلغي كلمة مستحيل
.
كات تصلي وتدعي لينا
كنا عايشين من دعاها
امي كانت احلي مينا
عشنا بعديها ف متاهه
امي اخدت كل حاجة
حتي رحنا كمان معاها
بعد منها الدنيا سودة
والطريق اصبح طويل
.....
أحمد حسن عمر