يا مصر يا مدرسه
والكل فيك استاذ
فيكي الأمان أتنسى
والذنب حل وجاز
فيكي الفصول ف السنه
فيكي الجدال والأنا
فيكي العذاب
والهنا
ممنوع كما الإنجاز
فيكي النجاح اتمنع
صدرك خلاص اترضع
حتى الرغيف اتقطع
زي السولار والغاز
انا بين عنيكي دموع
بسهر على خدك
بفطر بمر وجوع
واتعشى نار ردك
انا إبن للمسجون
والأخ للقاضي
لما الوطن بيهون
ازاي اعيش راضي !
الدرس مش مفهوم
والوقت مش كافي
والعدل مش موجود
والحضن مش دافي
خايف أقول انساك
ارخص مابين الناس
بعشق حياتي معاك
ولاعندكيش احساس
خليني ف جفونك
وقت الظلام والخوف
رب العباد عونك
يا سر بات مكشوف
بكتب بجاف انما
الرد فيكي رصاص
الحب فيكي انعدم
والرحمه والأخلاص
حقك على الحكام
والشعب والإعلام
والحكم كان إعدام
والحق فيكي انداس
يا مصر يا مدرسه
فيكي الجميع : استاذ !!!
............
ضياء الادريسي