حوا.....قصيدة للشاعرة / مروة سليمان

الضلع كون م الجناب
حوا
لحظه ميلاد
العشق رابض ف القلوب
من غير ميعاد
امر الالهه
اتفرقوا
واصلوا الحياه رغم البعاد
وانا كنت آدم بعشقك
كنتى انتى حوا م الضلوع
عهد البعاد
مختوم بامضه بسمتك
ممنوع رجوع
رافضه الخضوع
وانا كنت راسمك سكتى
ومضيت ف اخر رسمتى
بصمه بنقطه دم لترابك
خبطت على بابك
وقت اللقا
غيرتي كل ملامح بصمتى
وبدرتى على قلبي الحزين
حبه وجع
حوا اللى كات متشوقه
حفرتلى قبر ف حضنها
قتلت جدع
حضنك طوفان
قتل اللى حابب يحضنه
ساعه ادان
كبر عليه
لكنه رافض يندفن
ازاى يموت
دمه اللى نازف ع التراب
ازاى يتوه
حوا اللى ختمت للبعاد
راح تنقتل
ضلعى اللى حامل عشقها
لازم يموت
واحرق قصايد حبها
اما انا
هرسم بواقى عشقها
واختم بباقى اللى انحرق
عهد اللقا فيا
وافضل انا آدم
عاشق تراب هي