مجروح وجرحى من الزمن
جوايا هَم وكوم محن
وم الحياه قلبى اشتكى
لما بكى فيا الشجن
مجروح وجرحى من سنين
والدمع سايل م العينين
تايهه خطاوى سكتى
مش عارفه بس تروح لفين
اروح لمين واشكى لمين
من الوجع ولا الانين
معذوره دقات القلوب
جوا القلوب متغربين
الشمع من حزنى انطفى
والشمس مش لاقيه الدفا
نور القمر هجر الشجر
لما الامان يوم اختفى
يا مجروحين ايه ذنبكو
يبقى الألم من حظكو
يا مجروحين ليه ف الحياه
الناس بتعشق ظلمكو
مجروح وعايش ف انتظار
فرحه ما بين كف النهار
ترسم خطاوى سكتى
تعلن أوان الانتصار
تعلن ميلاد فجرى الجديد
تكسر الطوق الحديد
لحظه مخاض.. ويا الألم
يتولد ........جوانا عيد
.................
رضا ابو الغيط