يا مصريين...قصيدة للشاعر الكبير / أبو عمار المصرى

مين راح ينسى ؟
ومين ما نسيش ؟
أنا مش ذكرى يا مصريين
لأ دة انا فكرة
مش هاتموت
حتى ان حاول ألف طاغوت
أنا بالدم خطاوى مرسومة
ع الأسفلت ..وع الزنازين
أنا شـَهـقِـة قلب المظلوم
لما تئـِِنّ الروح م البوح
لما الجرح ف عـِزِّ الـنـَزف
يبات مكلوم
أنا مش يوم
يوم هيعدى وغيره هييجى
ويصبح ماضى
أنا يوم رافض شكل الـقـَهــر
طـَعــم الـمـُـرّ
يوم يشهد له تاريخ ومسطَّـر
يوم ما الحق يـفـَكـَّر يـعـبـُـر
كل حدود الدايرة البــور
جاى الدور
على من هان الحر..... ف أرضى
على من خان الشمس يا بلدى
على من حاول يخطف عيشى
يوقف نيلى .....وقال هـتـعــدّى
أنا مش ساعة تلـِفّ الـعـَكــس
ولا علامة ف صدر زمانى
يوم ما تشوفها
عليك راح تـِصـعـَـب
أو تـِتــصــَعـَّب
من غير همس
من غير حس
أنا باقية ع العهد يا مصرى
دم الــحـُــر ف قلبى علامة
صوت الحق هيفضل يسرى
حتى ان قامت ألف قيامة
حتى ان رصوا رصاص
فى طريقى
هافضل ثــورة
هافضل .....ا ثــور