بتسألني عرفت ازاي؟
ومين قاللي؟
وإيه جاب الخبر عندي؟
ما تسألشي
يا قلبي يا عقلي يا كُلّي
مانيش محتاجه حد يقول
ولا محتاجه شئ بنّا
يروح ويعود بأخبارك
دنا ليلك
وانا نهارك
وانا حالك
وترحالك
وبسمع حتى صوت نَفَسك
سؤالك له جواب واحد
انا شمسك
وانا قمرك
ف مين غيري يكون ويّاك
ومين غيري اللي هيحسّك ؟
ياروح الروح بلاش شكك
بلاش عقلك يصوّرلك
حاجات مش صح
وإدخل جوّه شرياني
تلاقي النبض بيقولك
مافيش غيرك حبيب تاني
ولا قبلك
ولا بعدك
ومهما عنّي زاد بُعدك
هتلقاني معاك دايما
وأقرب حتى من نفسك
بلاش تسأل سؤال ممكن
يزعّل حُبّنا منّا
مدام الدنيا فتحالنا
دراعها تعالى نحياها
نكون ف الأرض أشجارها
ونبقى طيورها ف سماها
نعيشها بكل معناها
يا روحي قبل ما نمشي
ما تسألشي
..............
ريم صلاح