انا المنادى راكب حمارى
و ف قلبى نارى
مقلوب و وشى جهة الشمال
بلد غريقة و ف كل ضيقة
تيجى السريقة تاخد العِزال
تيجى السريقة تاخد العِزال
مش ذنب منى
دا غصب عنى
كل اما اغنى و اسرح فى حالى
صاحب المعالى يحكم بأمره
يسقينى مُرُه
و سعدى يبقى شئ م المحال
ف كل حاره ف كل عطفة
داير عليكو و صوتى يخفا
و لما يعلى صياحى تشفا
جروح جروحى
و اديكو روحى تفدى العيال
عمال اعافر فى البدر يكمل
و اما اكَمَل الدايرة تقفل
و مهما اعمل فى بدرى حالف
انه هايرجع على طول هلال
انا المنادى راكب حمارى
و ف قلبى نارى
مقلوب و وشى جهة الشمال
مجبور يا عالم على المهالك
ابو زيد و سككة فيها المسالك
لما بتحكم على اى هالك
بتخلى موتٌه صعب المنال
انا اللى وارث العرش دهبى
و لصوص بتملا و لصوص تعبى
و حتى تَعبَى ما يملا عِبى
اهدِى يا دنيا اعدِل يا حال
بقول كلامى و الكل سامع
دايما بنِحرِت جوا المواجع
لا صبر جانا ولا سعد راجع
م المنفى مهما طال المطال
انا المنادى راكب حمارى
و ف قلبى نارى
مقلوب و وشى جهة الشمال