وش صاحبى....للشاعر / وليد المليجى

رغم السنين اللى مضت
نبرة ف صوته ما اختفت
لسَّه معايا معلَّمة
بس الملامح كلَّها متغيَّرة
و الوش صار صفحة جديدة
بالقلم متحبَّرة
كل الخيوط اتقطَّعت
لكن ف إيدى لسة خيط
و انتا يا صاحبى اللى ابتديت
لمَّا رميت طوق النجاة
تجرى على كل اتجاه
لما رميت يومها العلم
تحت القدم
و اجرى عليك
و المس بإيدى جبهتك
و اصرخ و اقول
ثبِّت صنم
يمكن تفوق
بس الصنم فعلا صنم
ولا عاد يحس بكلمتى
ولا حتى سامع صرختى
إمسك يا صاحبى دفترك
دينك ضميرك أخرتك
كام ف الميزان
أهلك صحابك شلتك
بنت الجيران
قول يسووا كام
لو كان هيسووا سهرتك
و السهرة تحلى بأى لون
بيع يا صاحبى
لو هيسووا نزوتك
و انتا ف لحظة م الجنون
بيع يا صاحبى
لو هيسووا الرعب ف عيون البرئ
لو هيسووا قتل أو نهب و حريق
لو هيسووا منظرك
و انتا مدارى خنجرك
لو يوم هترضى و صفهم
إنك خسيس
إشبع و هيص
الشمس راح تطلع خلاص
خلاويص دى ايه... ؟؟
خلاويص دى لعبة
عدى منَّك وقتها
كبرت عليك
خلاويص خلاص
علشان جبان
راح تستخبى و ...
مش هتقدر يوم تقولها لـ يسمعوك
و يحددوا فين المكان
و انا قلت لك
كل الخيوط اتقطعت
ما فاضلش منها إلا خيط
خيط ربنا
حافظ عليه
هاتقولِّى ليه ؟؟
عمرك و فات منه كتير
لكنه منزوع الدسم
ايَّام عايشها زيَّها
زى العدم
احسب يا صاحبى حسبتك
فين صحبتك ؟؟
فين ضحكتك ؟؟
فين كيت و كيت ؟؟
لو قلتها
تبقى ابتديت
لازم تعود
يمكن ف يوم
نسرق دقايق من زمن
طاح بك و طاح بى
وقتها
يمكن يعود لى بعد غيبة ..... وش صاحبى