مش هاحلف
و رغم إن إنتي عارفاني
مانيش كداب ف إحساسي
راح أحلف لك
بكل ثواني قضيتها
ف لقاكي غريب
و كل دقيقة
شفت الحب جوايا
حزين و كئيب
و كل ليالي
دقت المر متغمس بنار جوفي
و دمع الشعر لما ينز ف حروفي
بكام كلمة
و أنا سهران أراعيهم
إذا يوم عطشوا أو
جاعوا
و أبين فرحتي بيهم
و اداري ف قلبي أوجاعه
سنين قضيتها أقول بكرة
تحس الآه
ف تكويني
و بكرة قريب
لكن بكرة اللي عمره ما جه ف نتايج رمشك المفرود
على أيامي
ما حسسنيش و لو مرة
بإني حبيب
و أحلف لك
بإيه تاني ؟؟؟؟
بمشيك جوا شرياني ؟
ببعدك و إنتي ساكناني
يا شايفاني كتاب مفتوح
و قرياني و فهماني
يا فرحي و سر
أحزاني
يا مرسومة على ضلوعي
بوشم ما يعرفوش غيرنا
و رغم دا كله
فايتاني
ف أحلام تشبه الكوابيس
أرص دقايق الحرمان
ف نبض حروف
بتتوضى بدموع شمعة دلال بنوتة مزوعة
ف غيط العمر
و مهما أحلف
مافيش غيرك
بيعرف قولي قبل الحرف ما يفارق
حدود حلقي
و برضه باقول
يمين بالله
أنا العاشق
لقسوة قلبك الطيب
و انا الراضي
بتلطيمي ف حواري العشق من صغري
وشايل فوق كتافي تاريخ
و أنا الدرويش
و توبي مدوباه شمسك
و جمر مشاعري فوق منه
بخور همسك
و ف إيديا و ف رقيتي
سبح صبّار
و مشواري مالهش حدود
ف ساحة عشقك الطاهر
الف ف ساقية الأحزان
سنين و سنين
و ما عرفش إن بير الساقية كان
قلبي
و أنا الغرقان
و مليون مرة قلت لك
أنا إنسان
عياط الناي نزيف روحي
و بإيدكي دوا جروحي
لكن حنيتك
قاسية
و طبعك يدبح العشاق
و أنا المشتاق لأتلم سيف
عشان شايف قساوتك خوف أكون
كداب
و رغم إن إنتي
عارفاني
مانيش كداب ف إحساسي
هاعيش العمر
أحلف لك
بإنك
لمستي الدافية و ربيع الكون
و إنك
نسمتي الصافية
ف صيف مفرود على جلدي
و مهما يكون
و لو قالوا إني ميت مجنون
أنا موافق
أنا موافق
أكون مجنونك إنتي
و بس
و هاعقل تاني لو قلبك
بقلبي يحس
.........
جابر الزهيري