كنت بحلم إمتى أكبر
لاجل تُحضن خطوتي بلهفه البياده
كنت حاسس بالسعاده
لما كنت ألمح أخويا
جاي ومادد خطوته قُدامه مد
كان يِعد الوقت عَد
لاجل يلِحق كفه يلمس إيد حبيبته
لما تِكسرضِحكته فـ عينيها سد
كت شفايفه مشتاقين
تمسح الحُزن اللي مرسوم
فوق جبين أمه وأبوه
كنت انا لساني عيل
بس عامل إني فاهم كل حاجه
رغم إني كنت ع السلم بتوه
كنت أشوفه من بعيد
جاي وحاضن فرحته
كنت أجري عليه وأنادي
إنتباه يامستجد
كنت برسم فوق ملامحي شكلي جد
شايف الإحزان تغيير عماله تحسد ضحكته
أجري في حضنه واسأله
انت ليه فرحان كأنك يوم زفاف..؟
كت أيديه عصفوره كتفي عِشها
هزني وقالي كرامتك ع الحدود
فاياك تخاف
واللي سامع حاله طبعا غير ماشاف
والجيش حياه
غير الحياه
تبقى شبعان فيها موت
لو ماجربتش فـ مره وعِشتها
واما اقوله الجيش ضريبه بتندفع
يجي رده طلقه في صدور العيال
الجيش شرف بيه ترتفع حتى الجبال
يوم يناديك الوطن لبي الندا
قول مُستعد
راجل جدع وقت الصعاب تقدر تسد
كنت أشوفه من بعيد
قلبي يفرح زي مايكون جانا عيد
راح يامصر عشان يسلم
باس ترابك جه شهيد
اسمه احمد .. اسمه بطرس
اسمه سامي
ايه يهمك م الأسامي
مش مهم يامصر اسمه
المهم إنه ابتسملك
يوم مافارقت روحه جسمه
اي مله وأي دين..؟
مش مهم
هو بلسم للي حبك
ولعدوك نار وسم
المهم الزرعه تكبر لو هانروي الأرض دم
المهم ان انتي ام
يام حضن يساع ولادك
لو هايبعد او يضم
حسسينا بالدفا مدى الأيدين
هو ليه نيلك ياغاليه
مش بيروي العطشانين..؟
ولا ليه لحمك ودمك
مِتسابين..؟
اوعي بكره تخبي وشك مِننا
ولا تيجي تسألينا
إنتوا مين..؟
......
ولاء عدنان