أنا قلبي مش سجاجيد صلا..
كل اللى عامل شيخ هايركع فيه
ولا بيت دعاره ف حاره ف كلوت بيه
انا قلبي تركيبة وجع متأصله
فيه الشيطان...
بيحب ريحة البخور
عصافير ف حلقة ذكر عاشقه النور
نبض الطهاره البكر
على حبتين أبلسه
فيه الملايكه بيلعبوا.. تلاميذ
بينطوا سور المدرسه
فيه الوجع سايب آثار جزمته
محفوره للذكرى
فيه حي جاردن سيتى
وتراب حارات شبرا
فيه حلم لسه وليد
وسِنّه خمسين سنه
فيه كائن اسمه ... أنا.
.......
أيمن هيبة