بالتعود والمسافة البكر بيننا
واللى بيننا وابتدأ يتلاشى فجأة
ايوة خاينة
ايوة كان جرحك مفاجأة
والبعاد مش بالمسافة وبس لكن
البعاد بقى بالتعود
يعنى غيبى عن عيونى العاشقة بكرة
وبعد بكرة وبعد بعده
وكل يوم هتحسي فيه انك تمام
شوفى بوست قديم كتبته
كان اكيد بتقول حروفه
نفس مفهوم الكلام
طنشى وبلاش تردى
وامنعى إيدك تشاور
وامنعى حتى السلام
بالتعود كل مرة وكل نوبة
هابتدى ازهق وامِلك
هابتدى اشحت فى صبرى
وابتدى من وعدى احلك
يعنى مرة ف مرة هانسى
جزء من وقتك معايا
لما يخلص فى الحنا بعضك وكُلك
واعمل ايه
اعمل ايه
مازهقت اقولك قلبى مش حمل الطناش
عينى مش حمل الخيانة
الخيانة برغم طيشى
كلمة بايخة مااحبهاش
عودينى واحدة واحدة
ازهق واسيب
وأرمى بُعدك ع النصيب
واقول لنفسى ماتستهلش
وابتدى اخنق فى روحى وأقضى وقت الغل الش
ع اللى كان لك بين ضلوعى
واللى كان لك فوق كفوفى
حققى بالهجر هاجس كان بيرمى ف بحر خوفى
من فراقك بعد قربك
عرفى عقلى انه خايب
لما صدق كل كدبك
فهمى قلبى انه جاهل
لما فكر يوم يحبك
والنهاردة انا مش راح اشتم أو اسبك
أو اعاتبك لحظة واحدة
لا انتِ هتكونى الاخيرة
ولا انا راح اكون نهاية
لكل شاب تسيبه واحدة
فاهجرينى واحدة واحدة
بكرة هاطفش بالتعود
بكرة راح امل انتظارى
كل يوم استنى قلبك ينسى ويسيب لى انهيارى
كل يوم اصبر واسامحك
تعوجى بايدك مسارى
والنهاردة مش باعاتبك
العتاب هيكون لقلبى
العتاب هيكون لى من سوء اختيارى
والقصيدة فضفضة والشعر غاية
زى ما كتبت ف بداية حبنا أجمل قصيدة
كان لابد اكتب كمان
واحدة بتقول النهاية
والنهاية مش سعيدة
فاوعى تفتكرى انك انتِ المُلهمة لكل القصايد
واوعي تفتكرى انك انتِ
فى الخيانة برضُه هتكونى الوحيدة
فيه فى روحى
الف طعنة والف جرح ف قلبى جوة
كلكم خاينين
وعنوان الخيانة
إيه يكون غير بنت حوا
ايه هتطرح أرض رملة وقلب بور
إيه هيجنى فى الحنايا كدب أو غدر وغرور
ايوة ممكن فى الهلاك توصل مراكب
ايوة ممكن فى السما تظهر كواكب
بس ابدا عمرها ماتعدى راكب
أو فى يوم النجمة تدى الأرض نور
كلكم خاينين وجوة قلوبكوا ضلمة
كلكم فى الغش ليكوا طريقة واحدة
كلكم ثابتين حضور
والنهاية برضُه واحدة
الشيطان وسوس لآدم قام قطف تفاحة واحدة
وابنه لما شيطانه وزه يسحب الروح من اخوه
قتله واستسهل جريمته
والسبب كت برضُه واحدة
وانتِ لما نسيتى قلبى
كان بعادك واحدة واحدة
فاندهي عيونك يبانوا
واندهي ايديكِ اللى خانوا
قلبى كان طيب وقلبك
فى البعاد سايق جنانه
لما سابنى بكلمة واحدة
كلمة واحدة
__________
وائل عبد الله