ما لوش صحاب
الا الطورية والكُوريك
طول النهار مستني رزقه م الجثث
يشق ريقه الصبر بشوية تراب
ويستعيذ م العذاب
بنقول عليه إنه شوم
غراب بينعق عـ السجر
فـ يحول التفاح لتوم
لو مرة عدى عـ القهاوى
الكل منه يستعيذ
وكإننا شوفنا قصادنا عزرائيل
فارد إيديه
نحودوا عينا قوام
قبل أما تيجى العين عليه
حتى أعز الناس عليه
مراته ام العيلين
بتقول عليه
إن دايما دمعته راقدة فـ عينيه
ياجى بيته عشان ينام
بالع في جوفه الكلام
مع إنه مليان بحكايات
وياما شاف قبور تنور باهلها
وقبور بتتحول حريق
جوه منه ينكمش
خايف طلوع آخر نفس
يبص ليها بعين بتنطق بالوجع
بحكمة اللي شاف نهاية الدنيا دي
حفرة أضيق من نفس
ماكانش بأيدي أكون كدة
أكل عيشي مـ الدموع
من صغرى مالقيتش معايا الا الغلق
و الصبر جوايا أتخنق
كل يوم أحفر قبور
و أخاف أموت
ما حد يترحم عليا
تعمل ايه يا عبـ معيـن
تورث الاولاد دى ايه ؟
إلا الدموع
أنت اللي ياما مديت إيدك في كل قبر
وشلت بأيدك ميتين
مين اللي يشلك فوق إيديه ؟
مين اللي يسبلك عينيك أو مين يدخل يودعك ؟
وأنت الخلايق كلها بتخاف تشوفك
يا مُر خوفك
مـ الـ يحصل لما تنزل ؟
قولي مين يحزن عليك ؟
ومين اللي يدخل يلقنك آخر شهادة
الا الطورية والكوريك !!!!
.......
أحمد فخرى