مين يِصَدَّقْ النهارده
إن تِلتْ الرحمه فات
ليه يا شهر الصوم بتجري
والليالي فيك ساعات
ليه بتستعجل علينا
م الفراق تبكي عنينا
وإنته تمشي من سكات
محتاجينك
حَبَّه حَبَّه
محتاجين اللمَّه تفضل
والْمَحَبَّه
بدون خصام ولا خناقات
محتاجين نور المساجد
للي راكع
واللي ساجد
نمشي تاني على الصراط
محتاجين الرحمه ترجع للقلوب
واللي عاصي
عن المعاصي كمان يتوب
والأخُوَّه
في الجوامع
والشوارع
والحارات
ليه يا دنيا
كل حاجه ليه جميله
ليه قليله
واللي نصبح فيه نبات
بدعي ربي بقلب خاشع
فيك وطامع
الهدايه من الغوايه
توبه من قبل الممات
ــــــــــــــ
أسامة علي الديب