مش قلت لك يجي ألف مرة خد قرار ؟
وحلفت لك ...
وحلفت لك هاتحيرك وتسهرك أيام كُتار ؟
كدبتني وماسمعتنيش ......
وسقيتني وياك في الهوا كاس المرار
نفسي اسألك ...
نفسي اسألك وتكون إجابتك جد جدا مش هزار
هو انت قلبي ولا انا .. واخدك إيجار
ولا انت غاوي تهدني وتهزني وتعلّني ؟
ولا انت بسم الحب ناوي تذلني .... الله الغني
إنسى في يوم إن انحني
ولا هارضى إسمي يكون في قايمة لنتظار
ولإن ده ف شرعي أنا ... يبقى اسمه عار .
سيبك بقى لعب العيال مش سكتك
ولا انت ناسي حضرتك
من صغرنا طول عمرنا كان لعبنا ويا الكبار
لو كنا نلعب ماتش حب ...
كنا بنكسب باقتدار .
وقلوب كتير اتمرجحوا
واتمسحوا لو يلمحوا نظرة عينيك
دقوا عليك يجي ألف باب
اللي خمري واللى شقرة
واللي بيضا واللي سمرة
واللي ماشية بشعرها
واللي لابسالك ........... حجاب
كام قلب داب ...
كام قلب من لهفته يا حسرته حبك دواه
ردك عليه بالنسبه ليه
فرحة عينيه ..إكسير حياة
كانت هوايتك في الغرام
تمشي الطريق عكس اتجاه
طوول الحياة ... عارفك عنيد
ولا حد عَمَلَك قنطرة
ولا كان لقلبك ع الطريق
ساعة وصول ولا فرملة
يا عنترة .....
لساها عبلة بتنتظر لحظة لقاك
لساها عايشة على الأمل
والمحتمل إنك تكون
لساك بتهوى المشوَّرة
يا هل ترى ...
مين اللي هاتنول الشرف تكسب رضاك ؟
مين اللي بيها هاتعترف تسكن سماك ..؟
أنا مش ملاك
لكنّي غير طبع البشر
و قلبي غير كل القلوب
ماعرفش أإيه معنى السهر
ولا يعني إيه أشتاق وادوب
والكون قصادي مالوش حدود
والدنيا عندي ماتساويش
ولا احب أقطّع في الورود
وافضل أقول لحظة سمر
بتحبني .. ماتحبنيش
بتحبني .. ماتحبنيش
بتحبني .. ماتحبنيش
ولا اعد أوراق الشجر
واهوّن عليا بأني اموت
ولا يقولوش قلبي انكسر
وارميك بإيدي في الهلاك
واقول نصيبك والقدر
وارميك بإيدي في الهلاك
واقول نصيبك والقدر .
------------------------------
محمود السيد