يا شعر أيه العمل
تعبوني أصحابك
دوول قالوا عن نفسهم
عباد في محرابك
وان مافيش زيهم
في الشرق أو في الغرب
بصيت لاقيت نصهم
أحلى ما فيهم ضرب
إللي يقول شاعر
واللي يقول فنان
كلام عديم الطعم
والريحة والألوان
واللي تقولك أنا
في الشعر م الأخر
ومن قصاد سكتي
الكل يتاخر
تعالى شوف قايمتي
تلقى الصحاب بالكوم
بإشارة من حضرتي
الكل ليا يقوم
مليان كلامي كتير
بالحكمة والعبارات
وتعالى زور صفحتي
راح تشهد الليكات
تلقى ميتين تعليق
وكتير من الضحكات
وياريتها كاتبة كلام
يدخل يا ناس المخ
تسمع كلامها تقول
هاتفوق هشام الجخ
تلقى الكلام مخبول
وانت شربت الفخ
------------------------
يا شعر فيك العجب
شوفناه وبالألوان
وان جينا يوم ننتخب
راح ينجحوا العميان
يا شعرا قولوا الحق
نفسي في حد صريح
مع بعض هانقول لاء
للي كلامه قبيح !!!
ولاّ نشوف الغلط
ونفضّل الكتمان ؟؟؟
-----------------------
ماتزعلوش والنبي
للحق أصلي باميل
الصدق دا مذهبي
باكره أوي التطبيل
هاشهد شهادة عدل
لو كان على نفسي
لو يوم كتبت الغلط
تلاقيني الووم .. نفسي
أقولّها فوقي
وياريت بقى تحسي
وبلاش تضايقي الناس
ولا للودان تأذي
----------------------
سامحوني انا بعتذر
خلص الكلام مني
أكيد كتير منكوا
حاسين وفاهمني
نفسي أنا زيكوا
الكلمة بينا تعيش
لو حد قال زعلان
أقعد ف بيتنا ماجيش
أحلف طلاق ع الشعر
واسرح أبيع .. ورنيش
احلف طلاق ع الشعر
واسرح أبيع .. ورنيش .
-------------------------
محمود السيد