مش كل كلام ينفع يتقال قصيدة.....للشاعر عبد التواب محمد

وعشان ما تلومش فـ احزانك باقى المخاليق
وتعلق فشلك ببساطه على ظلم الكون
لا تحب فـ مره ولا تصاحب ولا تبقى صديق
ولا تبقى بـ داء الحنيه جواك مسكون
عن قلب حنون
إتمرمط من حُسن النيه ومازال بيعافر
إتوضى بـ قُرب لـ إنسيه
إتصلى فـ بُعد من إلـ كافر
فـ إتصاب بجنون
(1)
الناس صناديق
وانا واحد دافن فـ مشاعره ييجى100صندوق
أول صندوق
صندوق البنت اللى هويتها ورجعت بقلبى المحروق
اخر صندوق
صندوق الأُم اللى فـ بيتها بـ اتدفى فـ حضن الصندوق
باقى الصناديق
الناس الصادقه اللى سابتنا وبقيت فـ بعادهم ملزوق
(2)
السكر ما يحلى الحادق
فبلاش تخلُطها حلال بـ حرام
حرير السُحت أقسى من الخيش
فى ناس بتعيش علشان تاكُل
وفى ناس تتقوت لجل تعيش
(3)
مجنون العقل إن كان ظالم
دعوات المظاليم خفافيش
سلطها عليه ربك فـ إتجن
مجنون القلب إن كان حالم
فـ مشاعره بتسكُن دراويش
و دى دعوه أحن
(4)
مش كل كلام ينفع يتقال
فبلاش تتكلم علطول
خفف من حملك يتشال
فـ الاخر
وحدك
مسؤل
ـ