من غير كلام ...بقلم الشاعر ابو عمار المصري

لما تنوى تغيب
تسافـِر
أو تغادر
حـُضن قلبى
إوعى تبقى ف يوم
ناسينى
ولا حتى تبقى فاكر
بس حاول
تفتكـِـر لحظات حنينى
شوق سنينى
الدايبة فيك
إفتكر أيام قضيتها
كنت بتخيـِّـل ساعتها
إن حبى وعمرى ليك
كنت دايماً
تقرا أفكارى ف خيالى
كنت ترسم ع العينين
وقت العصارى
لما باكتب فيك
سطور
ياما قلت الضلمة نور
كات تقول أحلى الأغانى
كات بتحلف إنك انت
سكنى ...دارى
كل كلمة قلتها لك
قلتها لى
كات نـَـغـَـم
حـِـلمى ف نهارى
لما تنوى خلاص رحيل
شوف بديل
يملا المكان
صعب جدا تبقى خالى
شوف خطاوى ع الطريق
ترسم المشوار صديق
أو تكون حلم الغريق
لطوق نجاة
ما انت ياما اديتنى
نـِسـمــات الحياة
يااااه يا قلبى
وألف ياه
كل أشعارى بتحلـِف
لأ بـتـِـنــزِف
شوق حروف
لما كنت باشوف فى عينك
كل حرف بألف خــوف
واحلف انه كلام وبس
ما انت قلبك بيـَّا حس
حبى ليك كان جوة قلبى
ناس كتير شايفة ف عيونى
وانت بس
كنت تقرا المستخبى
بين سطورى
إنت حددت النهاية
لما قلت خلاص
دة دورى ..كأنه مسرح
واتـقـَفـَل بعدك ستار
دورك انت الباقى يكمـَل
حـُـطّ كلمة للنهاية المحزنة
بـَعـتـَـر الأمل اللى باقى
واشطـُب بكل جراءة فيك
حـَـلــم التلاقى
سيبنى يلا لاشتياقى
تـِفـتـِكـِـــر أوتنسى
مش فارق كتير
لـسـَّـة العبير
ساكن على ورق الشجر
لسة الندى
بيخاف طلوع الشمس بدرى
بيخاف كمان حلم الشتا
حلم الجليد
حلم المطر
لسـّاك بتنوى ع السفر
والقطر واقف
قلبه صخرة من حجر
خـُـد لك مكان
بس افـتـَح الشبـَّاك
أشوفك
دارى دمعك
دارى حزنك
دارى شوفك
قول سلام
من غير كلام
ودَّع وســـا فـِــــــر

.............
بــقـــلــــــم ا لـــشــــا عـــــــر
أ بـــــو عــــمـــــــا ر ا لـــمــــصــــــــر ى