.jpg)
لما قالوا
انك نسيتى
وانهزمتى
وانكتب فى
اللوح مماتك
خدت كل العمر جيتلك
ابنى فى العش اللى صانك
من عيونهم ..
.كدابين
بياعين حتى الثمالة
والشجر من خريفهم
مات وضله صابه حبة م البطالة
وانتى تايهه فى الفضا المجنون
وخايفة لتضيع الرسالة
كان ضياكى يفرفط القمرة
ترسم خطاويكى تسابيح العبادة
فتبان ملامح السيادة
فنكتب فى الكون ايات الجلالة
لما قالوا
انك نسيتى
وانهزمتى
وانكتب فى
اللوح مماتك
وانا شريانى فاتح
على شريان حياتك
جيت و ح اغسل كل عتبة
بدم طاهر
اصلنا طلعت عيونا من جفونا
م النجاسة
واللى بيقولوا السياسة
كلنا لبسين همومنا
زى جدر ما بيعرف اساسه
تبت يداه اللى افترى
واللى ساحب عضم روحى
واللى لبسني هدوم المصغرة
لما الخطاوى
تبقى فى السكة الطويلة مكسرة
والورد يطلع من حنين الارض
يلقى الارض مقفرة
تبت يداه اللى عامل من ملامحى شىء
ماهواش انا
واللى ناوى يشد من فوقى كل الاغطية
وانا نفسى استهجا
كرامة كات يوم هنا
كرامة ملفوفة بطهر الادعية
ندخل ا لمحراب بدم الشهادة
مش ح نتيمم
لكن بقلوبا ح نيمم
وجوهنا لعناوين العبادة
الحياة مش هى كرابيج السيادة
ولا نبنى فى عمرنا الفين هرم
لالفين فرعون زيادة
الحياة فاتحة ميادين الامل
لالف حلم محتمل
والف فجر مستنظر
هناك نفسه يكتمل
كلنا متشمرين متلضمين
واقفين صفوف جوا الخطوط
بيقولوا ايه
خطوط المستحيل
وانا يستحيل ح ارجع
اللى لما اشوف خطوط الفجر ترجع