حلم الغلابة رغيف...للشاعر / محمد حميدة

يا عتمة الليل الطويل
أنا قلبي زي الفلاحين
بيكونوا عز الضلمة نور
عارفين طريقهم والسكك
تحت القدم بتكون صديق
بتبشبش الطوبة إن تكون
تحت القدم راح تستقيم
يا عتمة الليل الحزين
دمع الحيطان متسرسبة فوق الرصيف
فإزاي ينام إبن الشوارع ع الحيطان
وإزاي يكون حلم الغلابة
مش رغيف
مش شئ مخيف
إن الظلام في الليل يطول حبتين
ما العتمة في بطون العيال أغمق كتير
وما فيش نهار بيخشها
غير ضي مخنوق في الرغيف
وما فيش فرح بيخشها
ولا حتى زيف