نقطة .... ومن أول أمل بقلم الشاعر /حمدي موسى

 

نقطة.... ومن أول أمل
عشقت بعدك يا أمل ونسيت خلاص
وآدينى راجع يا أمل من غير حواس
هتقبلينى يا أمل
ولا انتى راخره هتضربينى بالرصاص
عارفك حبيبتى طيبة بتقدرى
هتلملمينى مرة تانية وتغفرى
طول عمرى اخونك يا أمل إيه الجديد
طول عمرى اسافر واختفى وارجع وحيد
لو حضنك التوبة الأخيرة كان غضب
كان صدق قلبى خاف عذابك كان كدب
يا أم قلبى المؤمنه...يا حنينة
يا بداية النبض الحقيقى من كذا وتلاتين سنه
حبيت عليكى كتير اوى
وكل مرة ارجع بقصة مكررة
وكل مره ارجع قتيل
تلحقنى سيرتك من إيدين الغرغرة
راجع أبوس الصبر راضى بالحساب
راجع بخدى أمرمغه تحت العتاب
وانتى عارفه الحب شاطر يا أمل
دايما بيحلفلى انى آمن م العقاب
سامحينى راجع من مسيرة كلها كانت عذاب
والله راجع يا امل والقلب لسه عليه تراب
والله ما غيرت حتى لاكتئاب
كل القصايد خلف قلبى بيلطموا
شقوا الجيوب لبسوا السواد
والشعرا لسه ف كل واد
حمينى بعنيكى الطهور
صبى عليا نظرتين ...بخرينى ببسمتك
يا صاحبة التاج المعظم
دخلينى ف ذمتك
اقبلينى جندى تانى بين صفوف العاشقين
مخدوع وراجع يا أمل شايل هزيمة منكرة
وألف طعنه يا أمل
إيشى من أمام وايشى من ورا
معرفشى ايه اللى جرى
يظهر صابتنى دعوتك
إلهى ما تعرف تحب
وتنقطع كلمة بحبك من حبال الحنجرة
وبقيت محاصر بالكلام ...وبقيت محاصر بالملام
وبقيت محاصر بالسلام
غير العفار والشوشرة
انا بعترفلك بالخطأ
حاربت من غير السلاح
ونسيت تميمة حبنا
وقع الحجاب اللى انتى طوقتينى بيه
وآدينى راجع يا أمل مليان جراح
سامحينى من غير ما اوعدك
آدينى راجع يا أمل استنى تانى موعدك
هصبر كذا وتلاتين سنه
وان لحقنى الموت وغير فى المعاد
ابقى ادفنينى ف مسجدك

.........

حمدي موسى