إتسرسبت دمعات عيونى
واتصبغ بالحُزن .. لونى
عَند مااصحابى قالوا لى :
عيد سعيد
...............
عيد سعيد !؟
عيد سعيد ازاى نقولها
والفتن دى شدَّه حيلها
والعرب مش واخدَه بالها
ولاَّ واخده .. إيه يفيد !؟
...............
عيد سعيد !؟
و" العراق " بيقطَّعوها
والتتار استعمروها ..
نُص ناسها شرَّدوها
وداخله فى استعمار جديد !!
...............
عيد سعيد !؟
عيد سعيد وف " ليبيا " وِلعه؟؟
وف" سوريَّا " الأرض وَالعه
والغريبه .. الدُّنيا سامعه
ونفسها ان النار تزيد !؟
...............
عيد سعيد !؟
عيد سعيد وف" غزه " كارثه !؟
ناسها عايشين تانى نكسه
من حداد .. اولادها لابسه
واحنا راح نلبس جديد
.............
" غزه " طاحناها "البياده"
وال" حماس " فيها بزياده
وف " قطر " عايشه القياده
لجل ماتقود من بعيد !!!!!
.............
عيد سعيد !؟
وامَّا من أيام قليله ....
فى"الفرافره" بإيد عميله
إلتقينا ف يوم وليله ..
راح لنا .. تلاتين شهيد !!
...........
يبقا دا بالذمَّه عيد !؟
ويبقا فعلا عيد سعيد !؟
وحدَتك فين ياوطن
قوِّتك فين ياوطن
كان زمان عزمك حديد
............
لِم فى جرُوحَك وداوِى
وانتِفِض شِد الخطاوى
وقتها .. من غير قِواله
يبقا فعلا ..
عيد سعيد
.
عيد سعيد
...
....................
محمد البسيونى