الفقير..!! ******* قصيدة للشاعر / أحمد حسن عمر

ياللى رفـعـــت الدعـم إسمعـنى
قبل ما يبقى الوضـــــــع مخيف

زادت كل الأسعـــــــار يعــنــى
ولسه مـــوظف راتبى ضعيف

ولسه ما جيبتش كعــك وعجوة
ولسه عــزومة عــــــــم ظـــريف

إمســــــك ألف جنية وتعــالـــى
نـقـعـــد نحسب ف المصاريف

وإلغى اللحمه وإلغى الفــاكهــــة
وإعــرف ان مـافـــــيش تكيـــــــيف

بس احسب لى إيجـــار الشقة...
وأى مواصله وفـــــــــــول ورغيف

وخمسه عيـــــــال والأم معاهم
خـــدمــة بسيـطه بدون تكليف

أنا مش عــــــــــاوز أكل مانجه
ووعد ما اجيش جنب البلوبيف

ومش راح ابص لواكل رومى
وقاعــد بــاشـا ولبسه نضيف

خمسين ألف ياخــدها مرتب
وانا بتحـــــاسب ع التعاريف

قول لى إزاى اقــــــدر اربيهم
وافضل عايش برضه شريف

انت العــــــــــالم بيا ياربى
وانت القــــادر ع التصاريف
..............
أحمد حسن عمر