بضمير مرتااااح..
انا قلبي اتعود.. ما يزمزقش
ما يقفش كتير قدام..البحر
بخيال من قش..
ولا يبعت من شوق لامبارح
دعوات ع الخاص..
يعزمه علي شرف الصُحبة ..مَبيت
ولا يركن صف من الحواديت
الجايه بتتكلم عنها..
بتمجّد فيها..وتلعنها..
معقول.. ماعِقلِش.؟؟
يمكن مجنون..
يمكن بيشاور للجايات قبل مابتكون..
يمكن بيبحلق في الازمات..
الواخدة رقات من عُمر
.. الوِش
يمكن ما فهمش؟؟
او بس يجوز حاول..ما فلحش
وهتتعِب قلبك ليه..
وعلي مين.؟..
دا مجرد طيف.. في خيال الطين
راسم باترون للبني آدمين..
ومحدّد فيه..
الطول..
والعرض ..والتقاطيع
ومحدد شكل الشخصية
مخلص ومهاود.. يعني مطيع
ويكون لي متاح..
ويكون متعوّد علي الاوجاع.. .
ليلا..وصباح
وعظامة بتنشف ع الصدمات..
معجون بوفاءه بميّة ورد..
ومفرّق روحه لايها..حد
بيحب بجد.. وجد الجد
لكنه..بيؤمن بالاشاراات..
ويقينه عجيب..
شاهر اسلحته في وش الجاي
مع ان الجاي في عِلم الغيب..
أُسطي.. ومتوّدك.. ومدوحر
ولحد البخت بيتراجع..
ويقول دا نصيب..
ألوانه السبعة بنفس اللون..
بيقامر على قلبه.. بيخسر
فاتعود قلبه ماهوش مضمون
ولحد اليوم اللي ما طلعتش
الشمس عليه..
كان واهم نفسه انه المفرد
والفصلة..
واللي مابين اقواس..
ما بيشبهش عموم الناس..
الا في معانيه..
زعلااان من ايه؟!..
من خاطر عدّي وما سلّمش
من كلمة اتقالت على غفلة..
طلعت (معلش)..
انا قلبي اتعوّد.. ما يزمزقش
ما يقفش كتير قدام البحر..
بخيال من قش..
ولا يبعت من شوق لامبارح
دعوات ع الخاص
يعزمه على شرف الصحبة..
مبيت..
ويفرّق على روح احبابه..
كونيات ونبيت..
بيراهن نفسه.. يبات مرتاح
على حِجر الوحدة..
في حضن البيت..
وبيضحك..
وبيبكي ويفرح..
وان حس في مرة خلاص هيفوق
ينزل من فوووووق
ويقول لخيال يشبه روحه
بضمير مرتااااح
اشرررررب يا
ع
ب
ي
ط
............................
عفاف تركي