ما انا لو حاقول
حاكتب كتير
عن بدر ساكن في السما
حواليه نجوم
بتخاف عليه
من سهم شارد في الهوا
وخيال لصورتة بينعكس
على سطح ميه
في نهر نيل
فـوق الفرات
لجلن يعيش البدر
ساطع مرتين
الأولى ف احضان الصعيد
والتانية فوق نهر الفرات
بيسبح المولى الكريم
ربك عليم
إداني قلب معاه حروف
يلضمها في خيطان الغرام
يكتب كلام
يركب بحور الشعر
يتنفس غرام
ما انا لو حاقول
حاكتب كتير
عن فجر جوايا صحا
يسأل شعاع الشمس
وينادي الضحى
مستني إيه
ما عدش باقي في السما
غير بدر بيغازل نجوم
والشمس ناوية تزحزحه
عن عرش مملكة الهوى
بنهار عنيف
الحر ساكن سحنته
ومالوش ونيس
ما انا لو حقول
حاصرخ وأقول
الضحكة ليه متكتفه
ما عدش فيها بحور صفا
كل النجوم اتسلسلت
من قسوة العمر الطويل
والبدر نفسه بيشتكي
أصبح عليل
ضيَّعت عمري في الألم
شايل قلم
واحكي حكاوي العاشقين
واوصف عيون اتسبِّلت
ورموشها نامت في التراب
ما عاد جمالها بينطلق
يسبي قلوب العاشقين
ما انا لوحقول
لازم حقول
ارجوكي يا دنيا بقى
حبة حنين
.........
محمد البهنساوي