ثم ماذا
جوه دمك نبض عايش
رغم ان القلب فارش
ضحكة باهتة بلون دموعك
خارجة من عنق الازازة
تبتسم
والهم جوه الروح جدايل
واللي شافك
لسه بتجهز لعرسك
من ايديك وداك لشيبتك
وانت شايل قلب حاضن
مشهد اللطم ف جنازة
ثم ماذا
رغم ان الظلم بين
لسه جوه عنيك تحدي
لسه شايل قلب لين
بابتسامة حب وردي
واللي محفورة ف ملامحك
غنوة للوطن اللي مات
واللي فات وماعاشي جرحك
فاكر انك ذكريات
لسه عايش بعد منك
بس مخنوق بالسكات
حتي لو فاهم حقيقتك
ماانت عنده مالكش عازه
واما يجي يثور ويشجب
برضه مش حاسس بحيرتك
والا طعم شقاك و ريحتك
م اللي فاحت جوه دمك
او حكايتك
اللي كنت تقولها مبدأ
مش بتجني غير خسارة
ياما عشت سنين تكابر
لجل ماتقولها بجسارة
ع اللي باعك واللي خانك
واللي داس علي جرح ارضك
وانت حاضن ويا دمك
ضحكة مدبوحة..... وحجارة
...........
محمد محمد الطنطاوي