افتحيلي مرة قلبك
و اسأليني عامل ايه
قالو ليا أن انتي امي
بس حبك مش لاقيه
شوفت ياما عيال كتيرة
امهم بتخاف عليهم
كل ما يحسو المواجع
تجري تحضن و تداويهم
و انتي عمري ما دوقت حضنك
هو فعلا حلو... دافي؟
و لا زي الدنيا قاسي
و حمل ما تشيلهوش كتافى ؟
ردى مرة و كلمينى
مش تملى دايرة وشك
باصة بس على اللى هانك
و اللى همه ازاى يغشك
كل ما احلف يوم اسيبك
القى شئ بيقولى لأ
توهة تاخد عقلى منى
رغم انى معايا حق
طالقة كل كلاب شوارعك
يخطفو لقمة عيالى
يقتلو الضحكة ف عنيهم
لا و عاشقين وقف حالى
كلهم كارهين وقوفك
جنب منى ف وقت شدة
و ان غلطتى بحرف رحمة
يخنقوكى و تبقى ردة
مش حكاية قطر هى
داس على ولادك .. حرقهم
او سفينة ف بحر هايج
كات بترقص يوم غرقهم
و لا عشماوى اللى حبله
لف على رقبة شبابك
و السما من يومها راضية
تفضلى تقاسى ف عذابك
الحكاية انك نسيتى
مين فى لحظة برد ضمك
مين صرخ وقت انكسارك
مين وقف فى الزحمة يمك
مين كتب بالدم اسمك
فوق جبينه و قال تعيش
و اما سال ع الارض دمه
قال عشان يبقى لها ريش
تبقى تانى حمامة بيضة
شايلة ف جناحها الحياة
كله ضاع لحظة نسيتى
و الوجع جاب منتهاه
..........
فهمي علي نصر