البنت القاعده على الرمله
بتغازل موج البحر ساعات
وساعات ..
تكتب على وش الرمله حاجات
يمكن تفاصيل شكل امبارح
أو يمكن عن بكره اللي ما جاش
بتحاول تنسى وما بتنساش
ف بتكتب أحلامها الخضرا
على كف الأمواج الرايحه
البنت جناين م الفاكهه
تشبه أشجار دايما طارحه
وبطعم الشهد امّا بتضحك
يا جمالها بفاكهتها الصابحه
بتشوفها الناس دايما سارحه
مع موجه بعيده ف قلب البحر
وما حدش فاهم إيه السر
فاكرين البنت اللي بتضحك
جوّاها الفرح مالوش أخر
وما حدّش حس بطعم المُر
البنت اللي عيونها بتضحك
جوّاها مداين حزن وصبر
ودا سر قعادها قصاد البحر
علشان تحكيله ويسمعها
أو تغسل بالموج أوجاعها
أو ترسم أحلامها الوردي
وتعدّي الموجه وتمسحها
ما يبانش أثار
البنت الحور تشبه جنّه
إنما مخلوقه ف قلب النار
الوِحده وجع
والتوهه مرار
وعشان البنت نبات صبار
قدرت تتحمّل وتكمّل
الضعف اللي ف روحها اتحوّل
لعزيمه فولاز
من بعد ما كانت كسر إزاز
قدرت تتغلب ع الأوجاع
قدرت تحلم
وتعدّي على الجمر وتسلم
وان كان على وصف الوصف مجاز
تصبح إعجاز
البنت ماهيش تمثال للعرض
ولا صوره عشان تدخل برواز
البنت مداين للأحلام
والبنت القاعده على الرمله
لسّه بتحلم
أحلام على قد القد يادوب
مش طالبه أمير
ولا قصر يكون مفروش بحرير
ولا طالبه دهب وياقوت قناطير
البنت ما يفرقش معاها
غير قلب يكون بالحب كبير
يشبه لملاك انما إنسان
يرويلها القلب عشان عطشان
وان عز طلبها ف دنيا الناس
رح ترجع تقعد ع الرمله
تكتب أحلامها الورديّه
على كف الموج
....................
محمد ابو العبادى