إنت صح ..!! بقلم الشاعر المتميز / سعيد شكري

 
علمنى حبك ..!!
إن بعد الصبر .. جرح
وإن فرحى مكنش فرح
وإن قلبك
مهما حايل قلبى فيه
هو قلبك
أى شئ بيهون عليه
حتى حبك ..!!
آآه ياقلبك
مهما يغلط .. هو صح ..!!

كنت بفرش عمرى ليك
فرحة بتكحل عنيك
كنت منك .. كنت غالى
كنت زى ماقولتهالى
كل شئ بالنسبة ليك ..!!
والنهاردة .. جى ناسي
وللا تشمت .. أو تواسى
هو ده إحساسي بيك ..!!
ياللى حبك
كل فرحة قصادها جرح
آآه ياقلبك
مهما يغلط .. هو صح ..!!
انت خلتنى ف هواك
حب مش فارق .. معاك
غصب عنك .. او بإيدك
ليه سكوتى عليك يزيدك ..؟!!
ليه تبيع قلب إشتراك ..؟!!
رغم إن البعد وارد
حتى جرح القلب وارد
بس بيشوفك ملاك ..!!
ياللى حبك
كل فرحة قصادها جرح
آآه ياقلبك
مهما تغلط .. انت صح ..!!
..............
سعيد شكري