أنا قلبى دوامَه فـ مُحيط
كل امَّا اقرَّب مِن هواه
الاقينى بدخل فى الغويط
فارجع قوام واعمل عبيط
دَ العقل صُفَّارِةْ نَجاه
بِتفَوَّق المَضحُوك عليه
وترجَّعُه لو مَرَّه تاه
وتقولُه حافظ عَـ الحياه
و دِى بين إيديك تخسرها ليه
ساعة الغَرَق مالهاش كبير
والنفس بِير فيه اللِّى فيه
والموج عَفِى واوعى تجَاريه
هتعيش حقير هتموت حقير
و العَمر أوشك عَـ الرحيل
مش باقى منُّه خلاص كتير
فالحَق وقَدِّم أىّ خِير
وخَلِّى عقلك ليك دليل
وشراع وصولك فيك هدى
وان يوم هواك عاوزك تميل
اعصيه ، وقولُّه مُستحيل
...............
حماده ابهلوان