إفتح الشباك ..!!بقلم الشاعر المتميز / سعيد شكري

اللى باقى من سنين العمر لينا
مش ضرورى تكون .. عجاف
افتح الشباك لقلبك .. ع الحياة
اياك تخاف ..!!
حب روحك .. حب ناسك
حب كل الناس .. وعيش
كلمتين .. عقلك ف راسك
هنى قلبك من مافيش ..!!
ضحكتين .. فيهم خلاصك
ياما قلب الحر .. شاف ..!!

افتح الشباك ..
على النور اللى ساكن
جوه روح الطيبين
فوق خدود الورد ..
و ف كل الأماكن
حتى ف الناى الحزين ..!!
ليه تسيب الجرح .. ياخدك من حياتك
ليه بتنسي الجى .. وتعيش اللى فاتك
انكسارك مرة .. مش اخر المطاف ..!!
حب روحك .. حب ناسك
حب كل الناس .. وعيش
كلمتين .. عقلك ف راسك
هنى قلبك من مافيش ..!!
ضحكتين .. فيهم خلاصك
ياما قلب الحر .. شاف ..!!
..............
سعيد شكري