برغم سنينِك الـ واخدانا للمجهول
ورغم الخنقة والأزمات .
ورغم ان الأمل فيكي صبح مقتول
ورغم الحيرة والمتاهات .
ورغم انِك ...
بقيتي تعدلي المايل
ودايماً تقلبي المعدول .
ورغم البعد والمسافات
ما بين الحلم والتحقيق
ورغم ان الطريق حالِك
وحالِك اللي مستحلف
علينا كل يوم بيضيق .
ورغم ان المرار فيكي
صبح إدمان
ورغم ان الشريف فيكي
أكيد متهان
وريحة الظلم موجودة
في كل زمان
انا لسَّاني مش قادر على كُـرهك
ولا قادر أطيق بُعدك
وحاسس إني من غيرك مانيش إنسان
ولو فكرت يوم أبعد ..
أحس بإني متشرد ماليش عنوان
ومش محسوب على الدنيا وليَّا كيان
يا بر أمان ..
وأحلى مكان بروحي افديه
يا مصر يا قبلة العاشقين
وأرض الدين ..
وحصن متين ..انا الـ بانيه
وخدت العهد يا بلادي أموت واحميه
وتبقي يا مصر طول عُمرك
وطن عايش بيسكننّا
مش احنا اللي بنسكن فيه .
_______________
محمود السيد .