إيدين الأرض بتبوسها
وتحضن فيها بالأشواق
شقوق الفقر والحوجة
نقوش معبد
ف كعب غزال
عرق
موال
رغيف ناشف ومتلفلف
بدمعة قلبها مكسور
يا شال الصبر فوق ضهر البنات مقطوع
كفاية الشمس تلسعني
فلملمني في عيون الناس
أنا إحساس
وب ازرع ضحكتي في الأرض
سنابل قمحنا البلدي
بتعشق دمعة الغلبان
وترعة كفرنا العاصي
وانا راجع ف آخر الليل وب اتسبح
تلاغي ف عود من الرُمان
صبح ناشف
وكان مستور
أبووووس إيدك يا سيدي البيه
وما تخفشي لتتوسخ
أنا صليت بأوجاعي
ووضاني بياض الفجر
وكحلنيِّ سمار التوت :
رغيف
ولحاف
وحوض مترين
وعشة جريد
عشان بنتي
دي لسه بنوت
منيش طماع ولا طالب
جاموس ابيض
وكام فدان
ولا اتصور مع الإعلام
أكووووووون إنسان
ولا ابوسي على إيدك كمان مره
يا سيدي البيه
.....................
بكري جابر