ورجّعنا الخطى للأرض
راح الحق لترابه
ورجع الصمت للكلمة بمعنى ينكتب كشاكيل
وبالتشكيل.....يزين الحرف إعرابه
وعمر الحلم ما يمشّى الحياة قدام
ولو ننسى نقوم الصبح نتلطّع على بابه
نحاول نفتكر منه ولو تفصيله م التفاصيل
ولما الحلم يبقى جميل
بنتمنى يطول الليل
ومش عاوزين نشوف الصبح ولا نتهجّى ف كتابه
وبين النظرة والأخرى نفس دايخ
ومتكوّم فى صرّة روح
يقضّى العمر بالتيلة
منين مانروح جميع الخلق ترحيله
وشغيله بأمر الصبر بالكرباج
هتمشى ف الطريق لازم
وتحفر اسمك المفرود على شكلك
هتمضى انك هنا بأكلك
وهتسجل عد أحلامك الهبلة
على كراسك المقلوب
ذنوب لازم هتقبضها وتصرفها
فى سوء العمر
لازم تلتقى معيوب
وفى الآخر هتتاخر توسع للى جاى بعديك
وهتطاطى عشان الجسم هايعديك
وراح يعديك مرض قلبك
وهتموت الحياة ف إيديك
وسيبك بس من دعوة ياسيدى ربنا يخليك
ما دى الدعوة اللى مش مقبولة ولا معقولة
طبع الأرض ف الآخرة وف الأولى
بيبدأ من تراكيبك ويخلص فيك
وتيجى تموت تكون حوّشت كام عيل
تزود اسمك الأول بحبل حروف
تسلمهم وتتنيل
فامتشدش قوى ف الخوف
لتتلخبط خيوط الشمس بسحابة
وتتعطر ف لبلابه فاتطرح لوف
وعمر الشمس ما صدقت
ضعيفة الشمس كدابة
خيالها عبيط بيتخيّل
بتتسحب وتتراجع
تسيب الأرض بتليّل
ولا بتراعى أى ظروف
فامتصدقشى إن الحيطة بتدارى
ولا جوه النفوس أسرار
نهاية رحلتك هيه مكانك وانت مش دريان
فا متفكرشى ف الهجرة
ماتاه القطر ع القضبان
محطة ستر مش موجودة ف الرحلة
عشان انت ابتديت عريان
وهتروّح بتتطوّح
وترجع تانى مش إنسان
عشان الأصل شئ بالى وطوّالى هاتتحوّل
حروف الحالى للماضى
وتصبح كان
وبالتالى
سؤال الكهف إجبارى يا متبنج
هتوصل نوح
وبعد الألف وشوية لفين هتروح
ومن ثم
وحشتينى قوى يا مّه
مفيش بعدك ولا ضمه تلم الآهه ع المجروح
ياريتك لما تبقى تراب تشدى العزم والهمة
تواجهى الريح
يجوز تلفحنى واتعفر بشئ منك
يخللى ملامحى تتأكد بشكل صريح
عشان لسه النفس حاير مابين الشك والتوضيح
كمان لسه البدن داير ما بين الهمز والتلميح
فانا مستنى على ندهة كفاية خلاص
اسلم نفسى متكتف بكل ذنوبى
متجرد من القوه وم الحول
فانا أولى اشوف نفسى بشكل قبيح
وارجّع عمرى لأصوله
أسجل إسمى بس بدون
حروف لسه بتتوكل
وكون لسه بيتشكل
يليق بالذنب والتوبة
يليق بيّا كمان نوبه وانا مفتون
بكلمة كانا إنسانا
ومش هيكون
..........
حمدي موسى