يادى القصيدة اتمردى
باستسمحك تتمردى
وماتسمعيش منى الكلام
بالحلو ولا بالردى
متعاندينيش وحياة عيونك لامسحك
وانفخ فى نارك تبردى
لو شوفتى قلمى راح شمال
روحى اليمين
لو شوفتى مين
لو ألف واسطة م القوافى والبحور
لو حتى جالك قلبى واقف ع السطور
اوعى تلينى وتنزلى من ع العناد
إوعى تسيبى الكلمة تخضع للحنين
اوعى تصبى الشعر تانى ع القلم
إياك اشوف توقيع غرام على أى سيره أو أمل
مرسل من الشوق والألم
يظهر فى خانة مستلم
انسى انى شاعر واكسرى وزن الهوى
متفكريش غير فى الحروف اللى تشكل
معنى تانى للحياة أو بين قوسين
( ماحناش سوا )
لمى معانى الصبرمن كل الورق
إياك تخونى شقا القلق
لما وقف للحلم
متحمى بعرق
خليكى جنبى واثبتى
احنا بنهدم تربتى
انا وانتى لازم نتفق إيدك فى إيدى
نسد باب الصابرين
نردم ينابيع الأنين
نزرع بلادة ف جتتى
هانت خلاص الباقى يجى ميت سنه
عدينا أول منحنى
مفضلشى غير حبة شجن
والذكريات بكرة هتدبل وسطنا
هانت خلاص يادى القصيدة استحملى
فاضل على وقت الآدان ساعة سهر
وتبلى ريقك بالقمر وتكملى
صبح الصيام فى حبها للى يطيق
وعشان كده
ممكن نعيد العشق فى ايام أخر
واحنا قصيدتى على سفر
رايحين نواجه نفسنا
رايحين نقف للى اغتصب فينا الحياة
واللى قتل فينا براءة شعرنا
رايحين نخلص نفسنا من نفسنا
رايحين نواجه ضغفنا
ونطالب النسيان يجينا ف صفنا
ومفيش حرج
ان احنا نشرح جرحنا أو نوصفه
أو نسأل اللى بيعرفوا
او حتى ممكن نستشير السابقين الأولين المجروحين
ازاىى كمان اتصرفوا
لكن تلاتة خلفوا
صوتى وشكلى والهوى
زعموا بإن الشعر دون المستوى
وانى انا شاعر قوى
بس الطريق كان مش سوى
مش مستوى
مرة يروح ناحية هنا مرة يروح ناحية هناك
مش دوغرى ماشى ملتوى
فقلبت عذر الضعف صدقت الحجج
وتركت أمر القلب لضمير القمر
يمكن يتوب وتطهره نار الفراق
يعشق تراويح اللقاء
ويصلى من غير انحناء
يقطف من الأشواق ثمر
يكتب قصيدة من شفاء
من بحر شعر منهمر
................
حمدي موسى