بتخاف من مين ؟!
وانت اللي الخوف
بيخاف منك
وبيعمل لك مِيت ألف حساب
والموت بيموت ..
لما يشوفك
بتطبطب على دمعة عينك
وبتبقى سحاب
..
بيضلل ع الناس التايهة
تديهم مفتاح السكة
وانت الأبواب
وتخاف ازاي ؟!
بتغمض عينك وتفتّح
على صوت كرباجك
بيلسوع ضهر الدنيا
وبيعزف ناي
ولا همّك إيه رايح منك
ولا إيه الجاي
بتخاف من مين ؟!
وانت الشبعان ..
من لبن الشمس
وأبوك الريح
انت الأنهار والحرية
وانت الميادين
من غير قضبان
قطرك ماشي
في طريق بيبوس قدم الخطوة
والناس شاهدين ..
إنك هادم لبيوت الخوف
وانك معروف
وانك فارس
وانك حارس لبلاد المجد
وانك فيضان
النيل والسد
وتخاف من حد ؟!
تخاف ازاي ؟!
وانت الأشجار
اللي بتطرح وتشع نهار
وانت الأزهار اللي شذاها
دايماً يسرح عكس التيار
ازاي تنهار
وتخلي الغربان فيك تشمت
إجمد واثبت
واجه خوفك
واياك تهرب م الأقدار
...........
عماد سالم
نص جميل جدا وبه مفردات وصور رائعه لشاعر جميل متمكن ..يكتب بسهوله وسلاسه..احسنت شاعرنا الكبير عماد سالم
ردحذفاشكر حضرتك يا استاذ احمد
حذف