واتقابلنا مره تانيه
وف عنيكى رميت عنيا
تهت لحظه
كإنى غبت سنين طويله عن الوجود
ولقيتنى تايه زى قارب
وسط بحر مالوش حدود
خايف يكمل رحلته
وخايف يعود
مليون سؤال من غير ردود
لما اتقابلنا
واتقابلنا ..
كل شئ جوايا كان بيقول بحبِّك
بس آه من جرح قلبى وغدر قلبِك
كل شئ جوايا كان بيقول خدينى
بس خايف تانى تقسِى وتجرحينى
كنت طير بيحب غصنك
طفل عايش جوه حضنك
عشت ادافع عن وجودك
ضاع زمانى ف قلب سجنك
واتقابلنا ..
وف عنيكى سمعت صوت بيقول بحبَّك
بس خايفه
عارفة انى ف يوم جرحتَك
أيوه عارفه
شايفه جرحك بين عيونك
نظره حالفه
تنتقم من قلب خانك
حطمك .. ضيع أمانك
موت الفرحه ف زمانك
جيت اقولِّك متخافيش
كلمينى ومتداريش
قلبى هيصدق كلامك
بس قولى ماتهربيش
بس قبل ما اقول مشيتى وْكان منايا
مترحليش
وافترقنا ..
قد إيه كان نفسى اشوفك
قد إيه كان نفسى ارجع تانى
اتعلم كلامى من حروفك
واما شوفتك
جيت اعاتبك
شفت عمرى دمه سايل بين كفوفك
قلت اسامحك
بس كان جوايا جرحى
وانتى كان جواكى خوفك
...............
فؤاد إبراهيم