لما كان..... السقف ينشع
والحيطان تنزل دموعها
ييجى جرى قوام ويطلع
ع السطوح ويزيل وجعها
وأما ينزل...... القى قلبه
شال هموم... كل السنين
الهدوم غرقت ..فى حبه
وف ايديه..... الشقيانين
الهدوم مبلولة يا........ با
ألقى رده بضحكة صافية
صاحى ليه م تنام يا بابا
رغم رعشة ايده ..دافية
أامى تصحى وتيجى جارنا
انتوا ليه بقى..... سهرانين
يبتسم ويقول........ قدرنا
سقف بيتنا.... بلوح وطين
تدخل امى تجيب وابور
صوته هيصحِّى الجيران
يملا بيتنا دفاه........ ونور
شعلته............ تملا المكان
تبدأ السهرة ........الجميلة
رغم فقر الحال....... بنشوة
كان ابويا لوحدة .......عيلة
روحة صافية ......بجد حلوة
نشوة دى....أصغر ما فينا
بس كانت .....أحلا فرحة
ضحكة م الهم..... تداوينا
روحنا ليها تملِّى.... رايحة
تيجى ماجدة من سكات
زى نسمة.... صيف عليلة
تبتدى بيها......... حكايات
زى قصة ...ف الف ليلة
أما فدوة.... كات بترسم
حلم فوق خد....... الليالى
اصلها......... كانت بتحلم
تبقى... نجمة فى العلالى
نجمة تسكن جنب منها
شمس ..تملا الدنيا نور
اختى ألفت دى عيونها
فى الحياة بستان زهور
امى تيجى بشوق ولهفة
وتنادينى...... فين اخوك
يا امه نايم ما انتى عارفة
قوم ناديه ....وحياة ابوك
أالقى عمرو وكان صغير
حاضن ....الدنيا بايديه
احضنه من غير ما افكر
انت صاحى..... وللا إيه
يبتسم وينادى... لاحمد
يللا امك......... بتنادينا
احمد أصله كان بيسعد
قلبنا حنين......... علينا
قوم نلاقى الشمس طالعة
والحيطان نشفت دموعها
شايفة لمتنا . . ..وسامعة
امنا يتقيد.......... شموعها
تخلص ......الليلة الطويلة
والهموم........ ترحل وتبعد
كنا لمَّة. .. وكنا عيلة
اب شايل .............ام تفرد
إيد فى بحر الخوف شراع
ضامة كل........ قلوبنا بيهاِ
إيد بتحمى.... م الضياع
مهما يقسى... الكون عليها
همَّ دول .......والله عيلتى
كانوا اجمل شئ ف عمرى
بعدهم... تاهت سفينتى
ربِّى ليك .....سلِّمت امرى
ارحم اللى....... شالوا همى
واللى تعبوا... كتير عشانى
بعد ابويا .........وبعد امى
ليا مين .....فى الدنيا تانى
غيرك انت.... يارب وحدك
انت حسبى... وليك دعايا
خد بايدى......يارب .عندك
اللى كانوا فى يوم رجايا
.....
محمد عبيد