مهما حزنت ............ أو اتألمت
إوعى تقول انك .......... سلّمت
قول لليأس ...... انا عايش لسه
قول للحزن ........... انا اتعلّمت
.
متخليش ولا حاجه ....... تهدك
لو كان كل العالم .......... ضدك
لساك قادر ........... و بتتحدّى
لسه عزيمتك ...... قادره تشدك
.
حدد هدفك ........ وابدأ سيرك
ولا عن حلمك ...... يوم تتخلّى
إياك تضعف ........ قدام غيرك
ضعفك ........ قدام غيره مذلّه
.
إوعى تطاطي فيوم ...لهمومك
واعفق أملك ... واحضن يومك
خليك جامد قوي .. بين ناسك
خليك صامد .. وسط خصومك
.
مهما الدنيا اختارت ..... وجعك
مهما ليالي الحزن ....... خدوك
إوعى تنزل أبدا ........... دمعه
قدام ناس ....... حاولوا يهدوك
.
ورّي الناس من بره ... ملامحك
واوعى تبين ...... ثانيه عياطك
إنت ........... برغم الكل هتقدر
تهزم ......... من جواك احباطك
.
إتمرد ... على خوفك ..... دايما
إوعى تقول .. حرمت ... وتوبه
لو ف امبارح ....... واحد باعك
ف وقوعك.. تتباع ....100نوبه
.
فوّق روحك ........ أول ب اول
ماتخليش ....... ولاجرح يطوّل
أطرد أتخن هم ........ و دوسو
واقفل باب ....... وابدأ م الأول
.
إنت اللي هتنفع ..يوم .. روحك
و انت اللي عزيمتك ... هتفيدك
إتعكز ... أحسن ...... ما هتسند
على كتف .. مهوش طايق إيدك
.
دايما ... علّق ........حكمة ابوك
حوالين روحك ... سيبها ل مدّه
ربنا .. مهما الكل ......... سابوك
عمره .. ماهيسيبك .. ف الشدّه
.
خاف على نفسك و احضن فيها
ماتجيش ...... ويا الحزن عليها
الاحزان .. عمرها ..... ما تموّت
لكن .. هتعيش .. ميت .... بيها
.
إنت هتضعف .... لو ماقاومتش
إنت بتخسر .. يوم ... ما اسكتْ
الدنيا دي .. هتعيشها ... ل مره
مافيهاش تاني .... ولا كلاكيت
.
قوم ... وهتقدر ...... ماتكسلش
و اطلع بره ....... مداين خوفك
قوم من فضلك ...... ماتسلمش
ولا تستسلم ....... يوم لظروفك
.
.
.
الشاعر اللواء محمد هيكل