أبويا قد ما عـاش ... مابخلش بنصيحته
أبويا بعد ما مـات ما غابتش يوم ريحته
ماغابتش يوم حكمته ..عن عيني لثواني
منين ما خدني الزمن ... بترن ف وداني
هوه اللي بعد النبي ..... يحلا قوي ذكرُه
هوه اللي رغم الموت .... بهابُه و افتكرُه
فهمني معنى الزمن .... و الدنيا و الأيام
وسقاني من غير تمن وشبعت منه علام
وان زاد عليا الغشـم . ألاقيه بطيبة قلب
يشتـم ف نفسه .. ان شتم
و يقولي ..... يا ابن الكلب
.
عشـان يا واد تتهـــاب ..... الهيبه مش ببلاش
خللي الكـلام بحساب .... والعيبه ما تقولهاش
خليك كبير ف الناس ......... و سمعتك بترن
عمر الكبير ما كان ....... في الدنيا دي بالسن
عيش بالحلال لو حاف دا مفيش حرام بيدوم
و احذر تمللي و خاف ...... من دعوة المظلوم
فـرّط قـوي ف النـــــدل دا مسيــره هيخونك
وامسك فصاحب الفضل و شيــله ف عيـونك
لا تطاطـي ولا تنحوج .. ولا ييجي حد عليك
ولا تمشــــي أبـدا عِـوج ... يحتار عدوك فيك
.
أبويا عاش ع الارض .. تطرح نصايحه ماس
بيتك دا زي الفرض .. مايدخلوش .. أنجاس
إوعاك تخوض ف العرض
وتجيب في سيرة الناس
إوعاك تخللي الخد ............ لأي حد مداس
.
عيش الحياة مرجل ..... عيش الحياه إنسان
حاوط على اللي ليك ..... م الدنيا و الأحزان
خليك سند للجار .. و ما تجيش على الغلبان
أصل الزمن دوار .... و الدنيا ..... داين تدان
.
أبويا قاللـي إياك ........ م اليأس ف الرحله
خللي العشم ف الله .... وهييجي يوم تحلا
خد م الإيمان عكاز ....... يفتحلك المسـدود
ياما فكلي ألغــاز ............ وحللي المعقـود
أبويا كان أستاذ ............ ٱه و ربنـا المعبود
و انا كنت بيه م الزمن والدنيا دي .. مسنود
.
أبويا كان مدرسة ............ علامها بالمجان
حصه وجع بالقوي ...... واتنين تلاته حنان
أبويا رغم البساطه .. ف الحكمه كان لقمان
هوه .. اللي ليا اتخلق
هوه اللي مني اتسرق
لكن كلامــــــه حلق .. ف وداني حتى الٱن
.
.
.
الشاعر اللواء / محمد هيكل