بِتهرَب ليه
خلاص.. عادي..
تعالىٰ وروح
وعدِّي من قُصاد قلبي
لاعُمري هنادي على روحَك
بصوت مَبحُوح
ولا هَخَطِّي خطاوي جنون
تكسَّر فِ الهوا دَربي
ماعُدتِش الوم عليك واعتِب
ولا أبعت رسايل شوق
وأجري فِ الحنين واكتب
عشان روحَك قُبالي تروق
ماعَدش خلاص
أنا قلبي شَبع إخلاص
هَجرَّب أنسىٰ واتهاون
واعوِّد قلبي عَ النسيان
وإن سأل الحنين عنَّك
هَقولُّه كان ويامَا كان
وأهدِم جِسر أحلامي
ولَوْ تصالحني أيامي
راح ابعِد عنها بالمِشوار
أنا هَختار
أعيش دنيا بعيون ساكتة
وقلب مقفِّل اركانُه
وروحي تموت ب١٠٠ سَكتة
ولا خَطواتي يتهانوا
فعادي خلاص تُروح تيجي
مَهيش فارقة
أنا اتعودت عَ الفُرقة
وخَدت المَصل علىٰ إيدَك
وسلِّمت القَضا لسِيدَك
خلاااص
مَنيش هاعتِب عليك تاني
.....
منى عبد الرحمن