أنا مش شاعر
أنا زنزانه لكل مشاعر شاعر (فالصو )
خاف جلّاد
شافه بيلهب ضهر بيتين م الشعر الحر
كانوا لشاعر
خاف يكتبهم جوا ديوان مسموح له بنشره
(نطوا) ف قلب ديوان الشاعر
(المطبعجى ) ماهوش ذوّاق
ضاع الشعر وراح الشاعر
يكتب شعره ف (واق الواق) .
*****
أنا مش شاعر
بس باحس يوماتى بهزّه بتقلق خوفى
وبتتمرد على عصيانى
صوت سماواتى بيصرخ فيّا
إكتب تانى
ضايع قلمى ونص لسانى
إكتب تانى
خوفى بيقتل أى معانى
إكتب : واوعك تكدب تانى .
*****
أيوه انا شاعر
كان لى ميدان وحصان سبّاق
وقت الشعر ماكان يتسمم
كنت باكون له دوا وترياق
بس الخيبه
لما المعنى الحّر ف بلدى
يصبح عيبه
تصبح أى قصيده نفاق
أيوه انا شاعر
مهما هاقاسى ومهما هاعانى
هابعد وارجع واكتب تانى
ويّا نصير الكلمه الحرّه
اللى نفوه لبلاد الواق .
.....
علي جامع