اتحدى جراحك
بالضحكه
واكتم اوجاعك
بايديك
ماتسيبش الحزن
يعلم جواك
او يكسر
فرحة قلبك
او يخطف ضى
بيزق عليك
الشباك
او يعمل من روحك
مسرح
للعرض اليومى
او يلعب بيك
الكومى
اوعاك تتهز
فى وش الريح
او تحنى جبينك
غير لله
فبلاش الحزن
يشدك جواه
وازرع فى غيطانك
نور
عمر السجن ماكان
لا حيطان
ولا سور
السجن أنك تفضل
جواك مكسور
او تفضل عايش
دور العصفور
خايف من صيادك
ونشانه
من أمتى المسجون
يعشق سجانه
متخليش وجعك
يرميك على كيفه
او تبقى خيال
خليك على قد
ماتقدر
صالب طولك
الحزن دا غولك
خليك ماسك
ارغولك
كمل لحنك
لو كان الموت
عالباب
مستنيك
خليك ولاخر
لحظه فى عمرك
واقف على حيلك
خليك
.....
اشرف الشناوى